عن موقف النقابة المخزي

وأثناء خروجه وكل الصحفيين التونسيين حواليه جت المنظِمة وبمنتهى عدم الاحترام والتقدير علت صوتها أثناء ما الفنان بيشرح للصحفيين أسباب عدم مشاركته في المؤتمر وفضلت تقاطعه بمنتهى قلة الذوق بحجة إنه رفض يلتزم بالعقد بتاعه وإنه قابض فلوس! فما كان إلا إن في حالة التوتر والعصبية دي إلا إن الفنان يوقفها عند حدها ويقولها "اسكتي لو سمحتي" رفضاً منه لقلة ذوقها ومقاطعته في الكلام ووضحلها إنها أول مرة تنظم حفل وعشان كده كان سوء تنظيم شديد. أثناء ده رد عليه أحد الصحفيين التونسيين بمنتهى قلة الأدب وقال "أنت لا تشرف تونس" فبدل ما يقلل من نفسه أكتر من كده ساب العشوائية والهرجلة وقلة الأدب دي وسحب نفسه للخارج.

هو إنت فاكرها مصرية؟

بعدها تقوم حرب شنعاء على الفنان المصري من التوانسة وتقوم المنظمة تتكلم عن الفلوس اللي خدها وإنه لا يمثل الفن المصري. والأسوأ إن بعض الصفحات النسوية في تونس إستغلت الموقف واعتبرت اللي حصل إهانة للمرأة التونسية واتقال بعض الكلام المنح.ط من نوعية (هو انت فاكرها مصرية علشان تهينها؟) على اعتبار إن المرأة المصرية مهانة والرجل المصري متعود يهين المصرية بشكل مستمر.

يراجل كبر مخك واعتذر!

نقيب الموسيقيين في مصر طلب رسميًا الاعتذار للمرأة التونسية استجابة لطلب النقابة التونسية في فتح تحقيق مع الفنان.. وده بدل ما يحللوا الموقف بشكل سليم ويقفوا في صف الفنان أحمد سعد اللي كان معاه الحق ١٠٠٪ في موقفه.. خرج الفنان في فيديو يوضح للناس حقيقة اللي حصل بشكل سليم علشان تتضح الرؤية بشكل أكبر للناس..

بنعتذر لشعب مصر!

وامبارح والنهارده تباعًا خرجت المنظمة والمسؤولة عن الحفلة واعترفت إنه الفنان كان بيغني لايف بعد ما تم ادعاء العكس. وأنها أول مرة تنظم حفل وإن فيه معلومات وصلت غلط فحصل سوء تفاهم ومشادات واعتذرت للمصريين ومتابعين الفنان ودعته مرة كمان لتونس في حالة إنه وافق.. كذلك اعتذر نقيب المهن الموسيقية في تونس للفنان احمد سعد ووصف إن ده خلل خرج عن النطاق! وقال إن له كل التقدير والاحترام وحفلاته بتطربه شخصياً وإنه هيتخذ كل الإجراءات اللازمة في مسألة سوء التنظيم وقام بتقديم شكوى ضد المنظمة لأنها كشفت أجر الفنان وده محظور وممنوع!

تساؤلات مطروحة..

ازاي ده يحصل ونقابتنا تطلب الإعتذار رسمياً للتونسيات رغم إن مكنش في أي نوع من أنواع الإهانة صدرت من الفنان؟ إزاي يطلب من الفنان المصري يعتذر عن غلط مش غلطه وعن سوء تنظيم من الجانب الآخر؟ إزاي النقابة تحرج الفنان المصري بالشكل المهين ده وتقلل من قيمة أي فنان مصري برا من غير ما يحصل تحقيق شامل للي حصل؟ إزاي نرضى على نفسنا ننجر في مهاترات تحويل المسألة من سوء تنظيم وإدارة الى أصله أهان التونسيات وغير مرحب بيه في تونس؟

ختامًا

ودي رسالة لتونس.. إحنا بنحترم وبنقدر كل اللي بيحترم نفسه وذاته في تونس بشكل لا جدال فيه. لكننا مش هنقبل ابدًا أي إهانة لأي مصري يتهان وهو بيمثلنا مهما كان ويتم إستغلال الوضع لإهانة الرجل المصري والمرأة المصرية بشكل بائس وساذج زي اللي صدر عن بعض التوانسة! مفيش رجل أبدًا هيقبل على نفسه إهانة أي واحدة ست مهمة او راجل كانت وعمر ما كان ده أخلاق ولا شيم المصريين.. وكذلك بالمثل للمصرية. وأخيرّا رسالة للنقابة المصرية.. أنتم في ايديكم تعلوا من قدر ومكانة المصريين او تقللوا منهم في داخل والخارج وكله معتمد على مواقفكم الرسمية! وإن عدت مرة فمش هينفع تعدي/تتكرر مرة تانية..