عيد وفاء النيل و أسطورة عروس النيل

ايه هو عيد وفاء النيل؟

وفاء النيل معناه إن النيل وفى بالمياه الكافية وقت فيضانه في مصر لأن يوم العيد ده في كل سنة بيناسب موعد فيضان النيل أو وفاء النيل، و هي الدورة الطبيعية الهامة في مصر من العصور قديمًا، ويعني فيضان النيل إن النيل اتملى بالكم الكافي من المياه اللي هتزيد من انتاجية المصري زراعيًا وهتخليه يروي أرضه.

علاقة المصري القديم بالنيل.

بسبب ارتباط الخير عند المصري بفيضان النيل الي كان بياثر تاثير عظيم علي حياته اللي قائمة علي الزراعة بشكل كبير احتفل المصريون القدماء باليوم دا وعملوه عيد رسمي له مراسم احتفال وسعاده وتراث وفن وبقا يوم مهم من كل سنة بتحتفل بيه كامل الدوله المصرية بشكل شعبي وبشكل ملكي لأن على مر التاريخ لعب النيل دور كبير في حياة المصريين، في مصر قديمًا قدس النيل بإعتباره مصدر الحياة والخير في مصر، وقد رمز المصريين القدامى للنيل بملاك سموه حابى تخيلوه على هيئة رجل جسمه قوى و له صدر بارز و بطن ضخمه كرمز لإخصاب.

مراسم الاحتفال بوفاء النيل قديمًا.

وعلي الرغم من إن الاحتفال بعيد وفاء النيل فضل مستمر لحد ستينات القرن الماضي بشكل رسمي لحد ما تم الغاءه الا إن لو حبينا نتكلم عن ايه هو شكل العيد يبقا لازم نرجع للعصور زمان ونشوف ازاي المصري القديم احتفل بيوم فيضان النيل اللي خلاه عيد قومي وايه هيا مراسم الاحتفال بيه وقتها. فحسب الثلاثة لوحات المسجلة بالخط الهيروغليفي في جبل السلسة بأسوان و اللي بتحتوي على ثلاثة مراسيم بتعود لعصور الملوك سيتى الأول ورعمسيس الثانى ومرنبتاح فى الفترة ما بين ١٣٠٠ ــ ١٢٢٥ ق.م. بتقر المراسيم دي بأن تقام الاحتفالات لحابي (النيل) مرتين في السنة مع أعلى وأدنى ارتفاع للفيضان وأن يتم خلالها الاحتفاء بالنيل بتقديم قرابين مختلفة من الاسماك زي سمكة الأطوم والي كانت لما بتعوم فوق المياه تتمايل كالراقصة وكان المصريين أجدادنا يزينون سمكة الأطوم بألوان زاهية ويتوجون رأسها بعقود الورد والزهور ثم يلقوها في النيل وتم كشف سمكة من النوع ده في بحيرة قارون بالفيوم وكان من ضمن القرابيين القاء الخضروات والزهور والفاكهة. وكان بيخرج كل المصريين في اليوم ده للاحتفال علي ضفاف النيل في كل الاقاليم.. يجي سائل ويسأل..طيب فين البنت الجميلة اللي المصريين كانوا بيلبسوها حلو ويكتفوها ويرموها في النيل كده زي ما قريت في جروب الميمز ولا شوفتها في فيلم الفنان رشدي اباظة؟

أصل خرافة عروس النيل.

كتير من الناس مش بتدور علي إنها تعرف تاريخها من المصادر التاريخية الصحيحة ولا بتكلف نفسها حتي إنها تبذل مجهود في البحث عن مصدر الكلام الي بيسمعوه. عروسة النيل وانهم بيرموا بنت جميلة ما هي الا خرافة لا تطابق الواقع ولا حياة المصري بأي شكل، والخرافة دي قالها الكاتب اليه..ودي "باوتارخ فلوطرخس" صديق المؤرخ اليهودي "فلافيوس يوسيفيوس" واللي اشتهر بعداؤه وكرهه لمصر وثقافتها سنة ٨٠م في زمن الاحتلال الروماني المحارب للثقافة المصرية. الخرافات أخدها كاتب عربي زي "عبداللطيف البغدادي" وغيره ونسبوها لرسالة من عمرو بن العاص قائد الجيش الاسلامي لخليفة المسلمين عمر بن الخطاب وعلي فكره القصه اللي وردت في الرسالة دي ذكرت بعد ٥٠٠ سنة من موت عمرو بن العاص نفسه لأن عبد اللطيف البغدادي اللي كتبها ولد سنة ٥٥٧هـ أصلًا وده تقريبا بعد اكتر من ١٠٠٠ سنة علي سقوط الدولة المصرية، طيب تعالوا نحكيلكم علي حاجه وردت في القصة الشهيرة دي. "أن النيل لما انخفضت المياة بتاعته أشار الكاهن علي الملك أن النيل غضبان وعاوز يتجوز علشان تكون له ذرية" طب تعالي كده نقارن ده بثقافة المصري قديمًا المذكور في القصة و نبحث في صحة منطق الرواية النيل في الأساس عند المصريين وفي عقيدتهم كان اسمه حابي و كان مزدوج الجنس "راجل وامرأة" ولا يحتاج للزواج وهو مصدر العطاء الكهنة هيرموله عروسة يعمل بيها ايه ؟!

نفي القربان البشري تمامًا.

المصري قديمًا في عقيدته بيقف في المحاكمة بعد المو.ت و يتبرأ من اي جريمه رفضتها الديانة المصرية والقانون المصري ويقول نصًا من نصوص الماعت:

• لم اتسبب في أي ضرر لإنسان

• لم انسى أن اسقي نبات

• لم اعذب حيوان

• لم اتسبب في بكاء أي انسان

• لم اقصد ايذاء أي انسان

فا ازاي بعد كل ده هيرمي فتاة جميلة في النيل علشان تتجوزة وهو اساسًا لا يؤمن بذلك خلصنا الكلام بالمنطق والحديث عن أصل الخرافة طيب نيجي دلوقتي ونسأل هل الخرافه دي والي بيدافعو عنها عندهم مصدر اثري ليها؟ الاجابه لا مفيش دليل أثري علي صدق الرواية ده بالعكس فيه أدله علي كذبها زي الثلاثة الواح الي ذكرتهم فوق واللي بيوصفو الاحتفال بعيد وفاء النيل واللي مش مكتوب فيها إن في بنت جميلة بتترمي في النيل. وحسب كلام علماء المصريات والباحثين فالجميع بيرفض الخرافة دي وقام بنفيها عدة اشخاص زي الدكتور زاهي حواس والدكتور وسيم السيسي و الباحث الفرنسي بول لانجيه وغيرهم كتير.

ختامًا.

عروس النيل البشرية ما هيا الا خرافة انشأها مدلسين ملهاش أي علاقة بتاريخنا المصري حتي لو اتصاغت بداخل فيلم خيالي للفنان رشدي أباظة وانتشرت بين الناس اللي للأسف اعتقدوا إنها حقيقة. في النهاية اتعلم تاريخك من مصادر صحيحة واسعي للبحث عن الصوره الحقيقيه لاجدادك ولبلدك وبلاش تروج للاكاذيب وتنتقص من نفسك. كذلك بنتمنى زي ما الدولة أعادة إحياء عيد الأوبت في افتتاح طريق الكباش إنها كمان تعيد إحياء أعياد قومي. عظيمة زي وفاء النيل - سما تاوي (عيد توحيد الدولة المصرية) - رأس السنة المصرية ونستغلها كلها في زيادة الدخل من السياحة زي ما دول كتير بتعمل ومنها الصين كمثال.