اخر تحديث | الثلاثاء، ٥ سبتمبر ٢٠٢٣
الأهرامات بناها قوم عاد | لماذا تروج تلك الخرافات بين المصريين؟
من أيام نزل فيديو فيديو لإعلامية تدعي "نهي حمزة"، بتقدم فيديوهات وصناعة محتوى على السوشيال. الفيديو أقل ما يقال عنه إن هراء فكري محض بيتقدم علي إنه نظريات لعلماء كبار!
محتواه عبارة عن تجنى وتشويه فج علي الحضارة المصرية ودعم لأكاذيب تخالف علم المصريات والمنطق وبدون دليل علمي واحد!
تشويه الحضارة المصرية ونشر الاكاذيب..نهج مستمر
الفيديو ملخصه وصف أجدادنا المصريين بإنهم لصوص لأنهم سرقوا الحضارة وآثارها وتحديدًا الأهرامات من قوم عاد اللي عاشوا قبل المصريين اللي بنوا كل ده وبعد ما ماتوا المصريين جم نقشوا ونحتوا أسمائهم عليها واستشهدت بكتاب (الفراعنة لصوص حضارة)
وده كتبه شخص غير متخصص ومدّعى وان نظرنا للكتاب مش هنلاقي فيه مصدر أثرى واحد يدعم الرواية حتى وقالت إنها بتنقل عن علماء كتير اعتمدوا الرواية دي على حد زعمها وإنها "متتبنهاش" لكن مخصصالها حلقة كاملة للترويج ليها وطبعا لم يتم ذكر اي اسم لاي عالم أو أي مصدر علمي وأثري.
كتاب "الفراعنة لصوص الحضارة".
لحد آخر الفيديو مفيش ذكر اسم أي عالم آثار ومصريات نهائيًا..والاستشهاد الوحيد اللى قدمته او اعتمدته في بداية الفيديو هو كتاب "الفراعنة لصوص حضارة" كتاب كتبه شخص غير متخصص بعلم المصريات والتاريخ من الأساس اعتمد في كتابه علي تفسيراته الشخصية لبعض النصوص الدينية علي طرح بعض الأسئلة الجدلية بدون أي دليل قاطع لا أثري ولا حتي ديني (نهج الكتاب).
المهم لو كملت الفيديو علي نفس الأسلوب من تشويه وتكذيب لكل ما هو علمي وأثري واعتماد روايات خيالية ليس لها أساس من الصحة وانتهي الفيديو بإن (ياجماعه الفراعنة دول جزء من تاريخ مصر اللي مر عليها ناس وحضارات كتير) في محاولة بائسة لمقارنة أساس مصر وحضارتها الأم وأغلب تاريخها بحقبات الاستعمار والاحتلالات..
في محاولة بائسة أخرى لوصف أجدادنا بإنهم شعب مر علي البلد وانتهى في فصل واضح الأحفاد عن اجدادهم في فترة بنعيش فيها هجوم شرس من بعض الفئات الفكريه اللي بتحاول تفصل المصري عن جدوده وتاريخه وتسطح عقله وتبعده عن التمسك والمواجهة بحقه في آثار أجداده وتاريخهم وأرضهم.
خرافات على خرافات..
طب هل فعلًا مفيش أي مصدر لرواية قوم عاد بنوا الأهرامات دي وان المصدر الوحيد الكتاب ده؟
الحقيقة مسألة نسب الآثار المصرية لأقوام لم يجد لهم أى أثر هي مسألة اثارت جدل في العصور الوسطي قبل انشاء علم المصريات وقبل فك رموز الخط الهيروغليفي اللي ساعدنا علي قراءة ما تركه أجدادنا
فبداية الخرافة كانت من بعض المؤرخين العرب اللي اعتمدوا في كتاباتهم علي منظورهم لحضارة مصر اللي كان من خلال تراث شفهي خرافى عند العرب تناقلوه جيل بعد جيل حتي اصبح جبلا من الخرافات واحداث لم يعاصرها اقدم المدونين لهذا الكلام الفارغ.
يعنى تراث شعبى حكايات قبل النوم زى أمنا الغولة والنداهة وابو رجل مسلو-خة بس اتدون فى كتب والناس اعتبرته جد لحد ما اتعاملوا معاه انه فعلا علم وتاريخ.
ومكنتش دي الخرافة الوحيدة يعني مثلا كانوا بيشوفوا ان كان في واحد من خراسان ويدعي وليد ابن مصعب كان شغال عطار وجرب حظه في مصر فأصبح ملكًا وان هو ده فر-عون موسي اللي مجهول هويته للآن.
واللي دونوه عن مصر ده اقصى معرفتهم بيها لأنهم ميعرفوش أى حاجة عن ما هو مدون علي الآثار المصرية وكل الروايات دى فولكلور شعبى خيالى متعلق بثقافتهم وما ينفغش تحت اى ظرف حد يتعامل معاه إنه جد او كلام علمي لان لا يجود عليه دليل ولا مصدر.
والاتجاه ده مش جديد نهائي مثلا فى تراث الي-هود وبعض القساوسة في القرون الوسطي مليان خرافات اكتر من كده وخرافات عجيبة زي لما افترضوا إن الأهرامات مخازن غلال النبي يوسف.
الموضوع كله كان ماشى بشكل عشوائي وحكاوي من هنا وهناك والناس كانت بتصدق وده كله كان قبل ما علم المصريات ينهي الجدل بالدليل القاطع والأثري.
يعني بمعني آخر الروايات دي كلها تقر تشبهها ببعض الخرافات اللي كانت في اوروبا زمان واللي قضي عليها العلم الحديث.
علم المصريات قالها | المصريين بناة الاهرامات..
طيب احنا ذكرنا ان الكلام ده خرافة ملوش دليل علمي، طب ايه هو رأي علم المصريات بالادلة علي مسألة بناء الأهرامات؟ تعالوا نشوف..
بناء الاهرامات
أولا في مسألة بناء الأهرامات في علم المصريات والمكتشف من أدلة وأثر بيثبت إن من بناها هم أجدادنا المصريين وبنمتلك من الاكتشافات اكتشافين مهمين جدًا، وهما بردية وادي الجرف ومنطقة استراحة العمال ومقابرهم والأهم في الموضوع هنا هي بردية وادي الجرف..
اللي بتحسم الجدل بشكل نهائي لأنها بتوثق عمليات نقل الحجارة لتشييد هرم الملك علي ايد عمال من المصريين ١٠٠٪ مش عمالقة بأحجام كبيرة!! وبتأكد بناء الهرم ملك اسمه خوفو بدليل مادي حاسم معاصر لتلك الفترة وتوثق لنا ايضا دور بعض الشخصيات في تلك الفترة كالمهندسين.
• وده لينك البردية مترجمة:
واللي بيأكد برضو ان اللي بناها هو المصري القديم هو حجم الممرات الداخليه للهرم واللي متتناسبش خالص مع ناس عمالقه حسب الخرافة ما بتقول.
وبغض النظر عن كل ده واجب اننا نشير اللي إن مسألة بناء الاهرامات مش بس بتتمثل في أهرامات الجيزة التلاتة! مصر عدد الاهرامات فيها تخطي ال ١٠٠ هرم ده غير إن سبق بناء الأهرامات التلاتة هرم سقارة المدرج..
قوم عاد بنظرة تاريخية -دينية.
طبعا مينفعش نتكلم في المسألة دي من غير ما نتطرق لقوم عاد.
قوم عاد المعروف عنهم هو من خلال السردية الدينية الإسلامية وانهم كانوا قوم عمالقة غير مؤمنين واهلكهم الله ، والحقيقة مفيش أي نص ديني بيقول إنهم كانوا في مصر وبنو آثار الحضارة المصرية مطلقًا.
فالنصوص الدينية ذكرت قوم عاد فعلًا ولكن حتي مذكرتش اي شئ ممكن يتطبق علي ما يتم ترويجه..ومحاولات التفسير للآيات اللي في الفيديو أقل ما يقال عنها إنها ساذجة ومسيئة..
أما النظرة التاريخية هي مفيش اي أثر أو دليل مكتشف علي مكان قوم عاد أو وجودهم من الأصل، وده ملوش علاقة بايمان الفرد بوجودهم من نحية ذكرهم دينيًاولكن الاعتماد التاريخي أو الدلالة التاريخية والأثرية بتقوم علي اكتشاف مادي ولحد الآن متمش اكتشاف أي أثر لقوم عاد او هياكلهم لا داخل مصر ولا خارجها.
الصورة المستشهد بيها في الفيديو اللي ذكرتها الأستاذة نهي هي صور خيالية معمولة كتصميم على برنامج الفوتوشوب لأحد الفنانين الأجانب واللي هو نفسه متوقعش إنها يتم ترويجها بالشكل الكبير ده خصوصًا في دول الشرق الأوسط وشمال أفريقيا).
وده تصحيحات صور الهياكل العظمية العملاقة المنتشر: علي السوشيال الميديا:
http://dabegad.com/?p=17437 http://dabegad.com/?p=8466 http://dabegad.com/?p=1167 http://dabegad.com/?p=17300 http://dabegad.com/?p=1449
ختامًا..والقومية المصرية
إياكم ثم إياكم تاخدوا معلوماتكم عن التاريخ من صناع المحتوى غير المتخصصين من على وسائل التواصل الاجتماعي..لأن في مجتمعنا الخرافات بتميل للانتشار بينما المعلومة السليمة دايمًا ما بتكون منحصرة وقليلة..
خليكم متأكدين وواعيين إن تاريخك المصري وهويتك عليها حرب تاريخية ثقافية سياسية شتى من الداخل والخارج..متسمحش لحد يشكك ولا يزور تاريخك بأي شكل كان ولا تقبل ده أبدًا..قوم عاد هما المصريين الأصليين اللي بنوا الأهرامات مش هي الخرافة الوحيدة المنتشرة بين الناس..
كذلك خرافات متعددة انتشرت بين الناس في ظل انتشار المعلومات وسهولة اتاحة الMass Information بين الناس..وده يفسر ليه الأخبار الكاذبة والإشاعات والخرافات بتنتشر بين الناس بسهولة.
بنناشد يبقى فيه رقابة على المحتوى اللي بيتقدم عالسوشيال ميديا وكافة وسائل التواصل الاجتماعي كون ده شيء بيأثر في الوعي الجمعي وبيساهم في تغيير ثقافة الشعوب ومعلوماتها وتزوير تاريخها بمنتهى السهولة.
كذلك رسالة لكل اعلامي وصانع محتوى اعرف إن كل معلومة غلط بتنشرها بغرض إثارة الجدل والبلبلة واستقطاب المشاهدات مش هتمر مرور الكرام بدون رد ولا تفنيد ولا كشف زيف الادعاء وفضيحة الجهل المستشرية في قطاع واسع من مجتمعنا.
اللي بنى الأهرامات مهندسين وفلاحين وعمال ونحاتين مصريين..ودول أجدادك! مش عاد..مش عب.يد..مش فضائيين..مش يه-د..مش حضارة تانية متقدمة..
القومية المصرية ترى وتسجل لن نسمح لكم بتزوير التاريخ المصري والعبث في هوية الشعب المصري..وللحديث بقية!
