التقويم المصري .. أول تقويم في التاريخ

التقويم المصري هو أول تقويم معروف في التاريخ و هو موجود قبل عصر الأسرات، يُعتبر التقويم المصري هو الأكثر دِقة لحد انهاردة من حيث ظروف المُناخ و الزراعة، و من آلاف السنين لحد انهاردة بيعتمد الفلاح المصري على التقويم المصري لحساب مواسم الزراعة و الحصاد.

التقويم المصري مُكون من ١٣ شهر، و الشهور دي هي:

1. توت (١١ سبتمبر - ١ أكتوبر)

2. بابة (١١ أكتوبر - ١٠ نوفمبر)

3. هاتور (١١ نوفمبر - ٩ ديسمبر)

4. كيهك (١٠ ديسمبر - ٨ يناير)

5. طوبة (٩ يناير - ٧ فبراير)

6. أمشير (٨ فبراير - ٩ مارس)

7. برمهات (١٠ مارس - ٨ أبريل)

8. برمودة (٩ أبريل - ٨ مايو)

9. بشنس (٩ مايو - ٧ يونيو)

10. بؤونة (٨ يونيو - ٧ يوليو)

11. أبيب (٨ يوليو - ٦ أغسطس)

12. مسري (٧ أغسطس - ٥ سبتمبر)

13. نسيئ (٦ سبتمبر - ١٠ سبتمبر)

شهر نسيئ هو الوحيد اللي فيه ٥ أيام و كل يوم احتفال بإله من آلهة مصر القديمة و هم أوزيريس، حورس، ست، إيزيس، و نفتيس. أجدادنا قسموا السنة لثلاثة مواسم و كل موسم ١٢٠ يوم، و هم آخت (الفيضان) و برت (إنحسار المياة عن الأرض)، و أخيراً شمو (موسم الحصاد).

السنة المصرية اتعرضت لمحاولة تغيير في عهد الملك بطليموس التالت اللي كان عايز يزود يوم سادس على شهر نسيئ مرة كل ٤ سنين (السنة الكبيسة)، و اليوم دة يكون فيه احتفال ببطليموس و زوجته على انهم آلهة موازيين لأبناء نوت إلهة السماء. لكن كهنة مصر و الشعب رفضوا التغيير دة و متنفذش.

قام اغسطس اوكتافيوس قيصر بعد وصوله للحكم عام ٢٧ ق.م. بتعديل في التقويم اليولياني، حيث أخذ يوما من فبراير ليصبح شهرا مكونا من ٢٨ يوما (أو ٢٩ يوما في السنة الكبيسة) وخلا الشهر الثامن الذي اسماه باسمه (اغسطس) ٣١ يوم حتى يكون بنفس طول شهر يوليو الذي سمي على اسم سلفه يوليوس قيصر؛ واتبعت الامبراطورية الرومانية كلها هذا التقويم منذ ذلك الحين وكان يتم حساب عدد الأعوام بناءا على سنين حكم قنصلي روما اللي كان بيتم انتخابهم سنويا ويتوليان الحكم في أول يناير واحيانا كان يتم حساب الاعوام بدءا من العام المفترض لإنشاء مدينة روما (على سبيل المثال توفي هيرودوس الكبير حاكم فلسطين في العام ٧٥٠ بعد تأسيس روما).

علشان بتسق مع التقويم الروماني اليولياني الجديد اصدر اغسطس قيصر فرمان سنة ٢٥ ق.م باصلاح التقويم المصري بإضافة اليوم المقترح قبل ذلك حتى تكون متسقة مع التقويم اليولياني ولتمييزه عن التقويم المصري اتسمي بالتقويم السكندري وبعدها بالتقويم المصري وهو المُستعمل حالياً في الكنيسة المصرية و اللي بيبدأ من سنة ٢٨٤ ميلادياً ودي كانت فترة مقاومة شديدة للمصريين في الدولة الرومانية واتسمت بعصر الشهداء وتم تخليد ذكراهم بتصفير التقويم، من ثم بدأ التقويم الأثيوبي مع انتشار المسيحية من مصر لأثيوبيا.

رأس السنة المصرية بتكون يوم ١١ سبتمبر من كل سنة، و ١١ سبتمبر ٢٠٢٢ هو بداية سنة ٦٢٦٤ في التقويم المصري.

استمرار التقويم المصري لحد النهارده في هيئته وهو دليل من أدلة كتير على استمرارية الشخصية المصرية و الثقافة المصرية لآلاف السنين بدون أي تغيير يُذكر.

كل عام والأمة المصرية بخير 𓄋 𓊪 𓏏 𓆳 𓏏 𓏤 ⲛⲟϥⲣⲓ ⲣⲟⲙⲡⲓ ⲛ̀ⲣⲉⲙⲛ̀ⲭⲏⲙⲓ