اللهجة المصرية ... لغة المصريين الحديثة

اللهجة المصرية كانت أحد أهم أدوات القوة الناعمة لمصر في فترة الستينات و السبعينات من خلال السينما و الغنا والفن المصري بشكل عام، وكانت هي بتمثل الرقي والتحضر عند كتير من الشعوب حوالينا، وبالمناسبة مازالت لحد اللحظة دي وهي أحد أكبر اللهجات المنبثقة عن إمتزاج اللغة العربية باللغة المصرية (لغة المصريين الأصلية) مع بعض اللغات التانية زي اللغة الانجليزية و الفرنسية و التركية و الفارسية والإيطالية بإختلاف تفاوت التأثير.

اللهجة المصرية لها قواعد نحوية مستقلة عن نحو الفصحى زي الأسماء موصولة و أسماء إشارة و أدوات نفي و استفهام و مصطلحات و كلمات عرفنا إنها متوارثة من لغتنا الأصلية اللغة المصرية حتى اللحظة وهي متسجلة رسميًا بشهادة (ISO - 639 ARZ)، واللي بيقول عنها لغة شوارع او غيره لا يفقه شيء الا اللي بيسمعه من ابتذال محيط بيه.

اللهجة المصرية أُعتمدت رسميًا من ديزني في غالب أفلامها و كارتون الأطفال وكلنا ومش بس احنا الدول حوالينا المتحدثة بالعربية اتربينا علي عظماء في الدبلجة للهجة المصرية، وحتى كبرى ستوديات تصميم الالعاب بتختار اللهجة المصرية لدبلجة العابها كونها أهم لهجة في العالم العربي.

بالمناسبة اللي بيزايدوا بإن "أصل ده عمل تاريخي مينفعش فيه لهجه مصرية" نحب نقوله، لو رجعت لأغلب الأعمال السينمائية التاريخية المشهورة والمحفورة فى الأذهان هتلاقيها كلها كانت "بالعامية المصرية" بداية من الأفلام اللي كانت بتعرض وتناقش "ظهور الاسلام" و "هجرات الرسول" وحتي هتلاقي والدك و والدتك وشعوب الدول المجاورة كلها في كل مناسبة دينية تخص مولد النبي أو العام الهجري بيتابعوا زي فيلم "فجر الاسلام" او "الرسالة".

كمان مش عايزين نغفل الأفلام التاريخية التانية اللي ناقشت جزء من التاريخ المصري زي فيلم "الناصر صلاح الدين" بغض النظر عن المعالجه التاريخيه ، وفيلم "واسلاماه" وغيرهم الكتير..

ختامًا

العامية المصرية هي لغة الشعب المصري اليومية اللي بنتكلم بيها كمصريين و ده مش هيتغير وهي جزء راسخ في هويتنا كمصريين ورابط وشاهد علي تاريخنا و لغتنا المصرية الأصلية اللي مكتوب بيها كل تاريخنا كشعب وهي جزء رئيسي حاليًا من ثقافتنا وأساس قوتنا الناعمة في الخارج.

أخيراً إستمتعوا بالمسلسل اللي هيبقى علامة فارقة في الفن المصري وبلهجتنا المميزة فيه، ومتخلوش حاجه تنفركم من ثقافتكم مهما حصل